हल्दीबारी, ११ मंसिर
हल्दीबारी गाउँपालिका–२ र ३ को जोडान बिन्दु रहेको लक्ष्मी मावि पूर्वस्थित भुसुडी खोलामा निर्मित पक्की पुल आज औपचारिक रुपमा सार्वजनिक गरिएको छ। स्थानीय विकासको महत्वपूर्ण पूर्वाधारका रूपमा चिनिएको यो पुल एक करोड ३० लाख रुपैयाँको लागतमा तयार भएको हो।
२६.८० मिटर लम्बाइ र ७.५ मिटर चौडाइको सो पुल निर्माणसँगै करिब ५ सय घरपरिवार प्रत्यक्ष लाभान्वित हुने अनुमान गरिएको छ।
उद्घाटन गाउँपालिका अध्यक्ष रविन्द्र प्रसाद लिङ्गदेन तथा उपाध्यक्ष लक्ष्मीदेवी मैनालीले संयुक्त रूपमा गर्नुभयो। कार्यक्रममा वडा नं. ३ का वडाध्यक्ष विष्णु प्रसाद ओली, कांग्रेस हल्दीबारीका सभापति गंगाप्रसाद प्रसाई, एमाले हल्दीबारीका अध्यक्ष त्रिलोचन सापकोटा लगायतका स्थानीय राजनीतिक तथा सामाजिक अगुवाको उपस्थिति उल्लेखनीय थियो।
बक्ताहरूले पुल निर्माणले स्थानीयको दैनिकी सहज बनाउने, सेवा–सुविधामा पहुँच बढाउने तथा आर्थिक गतिविधि तीव्र बनाउने विश्वास व्यक्त गरे।
कार्यक्रममा प्रमुख प्रशासकीय अधिकृत मानबहादुर वनमहेन्द्रले स्वागत मन्तव्य सहित पुलको आवश्यकता, बजेट तथा निर्माण प्रक्रियाबारे जानकारी प्रस्तुत गरेका थिए। कार्यक्रमको सहजीकरण योजना शाखा प्रमुख राजन न्यौपानेले गरेका थिए।
