बिर्तामोड, २ साउन
श्रम संस्कृति पार्टी बिर्तामोडको आयोजनामा यही मिति २०८३ साल साउन २ गते बिर्तामोडका श्रमदाताहरूको उल्लेखनीय उपस्थितिमा धार्मिक तथा पर्यटकीय स्थल विरटपोखरीमा श्रमदान पश्चात् विभिन्न दाताहरूले प्रदान गरिएको श्रम संस्कृति पार्टीको टिसर्ट वितरण गरिएको थियो।
श्रम संस्कृति पार्टी बिर्तामोडका अध्यक्ष सुवास मोक्तानको संयोजकत्वमा सञ्चालन कार्यक्रममा श्रम संस्कृति पार्टीका केन्द्रीय सदस्य हिमालय प्रकाश कन्दङवा, जिल्ला अध्यक्ष केशव भण्डारी लगायत व्यक्तिहरूको उपस्थिति रहेको थियो। बर्खा यामको समयमा बढेको झारपातले विरटपोखरीको सौन्दर्यतालाई असर गर्ने र पर्यटकहरूको आकर्षणमा कमी ल्याउने भएकाले स्थानीय धार्मिक पर्यटकीय स्थललाई सफा स्वच्छ र हराभरा बनाउन स्थानीयहरूको पहिलो भूमिका हुने भएकाले सरसफाई र फूलबारी गोडमेल गरेको आयोजक समितिका सचिव घनश्याम चेम्जोङले जानकारी दिनुभयो। हप्ताको छ दिन आफ्नो लागि र एक दिन राष्ट्रको लागि भन्ने नाराका साथ सञ्चालन भएको श्रमदान आजभोलि झापाका विभिन्न स्थानहरूमा देख्न पाइन्छ । श्रम संस्कृति पार्टीका संयोजक हर्क साम्पाङ जसलाई श्रम पिता भनेर पनि चिनिन्छ उहाँले सुरु गर्नुभएको यो श्रम संस्कृति आजभोलि झापा जिल्ला मात्र होइन देशका विभिन्न ठाउँहरुमा सञ्चालन रहेको छ र भर्खरै सुदूरपश्चिममा रहेको दार्चुलामा झुर्लुङ्गे पुल निर्माण कार्य सम्पन्न भएको छ। देशविदेशमा रहनुहुने नेपालीहरूले आर्थिक सहयोग र नेपालका श्रमदाताहरूको सहयोगमा निर्माण गरिएको झुर्लुङ्गे पुल बनेपश्चात् त्यहाँका स्थानीयहरूले उपभोग गर्न पाउँदा धेरै नै हर्षित भएको कुरा त्यहाँका स्थानहरूले बताउँछन्।
