इलाम, २७ चैत
-गजेन्द्र कुमार शेर्मा
इलाम, देउमाई – इलामको देउमाई नगरपालिकास्थित वडा नं. ३ पानिटारमा दोस्रो देउमाई कृषि तथा पर्यटन महोत्सव आयोजना हुने भएको छ। पानिटारस्थित सामुदायिक विकास समाजको खेल मैदानमा सञ्चालन हुने उक्त महोत्सव २०८२ साल चैत्र २८ गतेदेखि सुरु भई २०८३ साल वैशाख ५ गतेसम्म सञ्चालन हुने आयोजकले जानकारी दिएका छ्।
“पर्यटन विकासका लागि युवा” संस्थाको आयोजनामा हुन लागेको महोत्सवले स्थानीय कृषि, पर्यटन तथा सांस्कृतिक पहिचान प्रवर्द्धन गर्ने लक्ष्य लिएको छ। महोत्सव अवधिभर राष्ट्रिय स्तरका गायक–गायिकाको सांगीतिक प्रस्तुति रहनेछ भने विभिन्न समुदायहरूको सहभागितामा झाँकी प्रदर्शन, मौलिक भेषभूषा, कला तथा संस्कृतिको प्रदर्शनीसमेत गरिनेछ। यसबाट स्थानीय कला र परम्पराको संरक्षण तथा प्रचारप्रसारमा टेवा पुग्ने अपेक्षा गरिएको छ्।
महोत्सवमा कृषि क्षेत्रसँग सम्बन्धित विभिन्न स्टलहरू राखिनेछन्। ती स्टलहरूमा स्थानीय कृषिजन्य उत्पादन, जैविक खेती, बीउबिजन, आधुनिक कृषि उपकरण तथा प्रविधिसम्बन्धी जानकारी उपलब्ध गराइनेछ। यसले किसानहरूलाई नयाँ प्रविधि अपनाउन प्रेरणा मिल्नुका साथै स्थानीय उत्पादनको बजारीकरणमा सहयोग पुग्ने विश्वास गरिएको छ्।
मनोरञ्जनात्मक कार्यक्रमअन्तर्गत रोटेपिङ फन्को, १० किलोमिटर म्याराथन प्रतियोगिता तथा खुल्ला पुरुष भलिबल प्रतियोगिता आयोजना गरिनेछ। यस्ता गतिविधिले महोत्सवलाई थप आकर्षक बनाउनुका साथै खेलकुदमार्फत युवाहरूलाई सक्रिय बनाउने लक्ष्य राखिएको आयोजकले जनाएको छ्।
त्यसैगरी, देउमाई नगरपालिकाभित्र र आसपासका पर्यटकीय क्षेत्रको फोटो प्रदर्शनी, पुराना ऐन्टिक सामग्रीको प्रदर्शनी, हस्तकला तथा चित्रकला प्रदर्शनीसमेत आयोजना गरिनेछ। विद्यार्थीहरूका लागि होमस्टे तथा पर्यटन अभिमुखीकरण कार्यक्रम सञ्चालन गरिनेछ, जसले स्थानीय पर्यटनको सम्भावना उजागर गर्नुका साथै विद्यार्थीहरूमा पर्यटनप्रति जागरुकता बढाउने अपेक्षा गरिएको छ्।
महोत्सव अवधिभर कृषि विज्ञहरूको सहभागितामा किसानहरूका समस्या समाधान तथा आवश्यक परामर्श सेवा उपलब्ध गराइनेछ। यसले कृषि उत्पादन वृद्धि, प्रविधि प्रयोग तथा व्यवसायिक कृषिमा किसानलाई उत्प्रेरित गर्ने आयोजकको विश्वास छ।
- समग्रमा, महोत्सवले स्थानीय कृषि, पर्यटन तथा सांस्कृतिक सम्पदाको संरक्षण र प्रवर्द्धन गर्दै स्थानीय अर्थतन्त्रलाई चलायमान बनाउन महत्त्वपूर्ण योगदान पुर्याउने अपेक्षा गरिएको छ ।
